مامور بیچاره

په ژوند کې له غربته تل ګرځيږي سرګردان

مامورغریب وي یو مړۍ ډوډۍ لره حیران

--------

راځه د مامورینو ژوند ته لږ وکړو نظر

د دوي د مشکلاتو به ځانونه کړو خبر

غریبه طبقه ده، تل وي ستونزو سره سر

ژوندون یې خالي نه دی هیڅ ستونزې او خفګان

مامور غریب وي یو مړۍ ډوډۍ لره حیران

--------

په لاره چې سحر وختي روان وي وظيفې ته

چې کمه کرايه يې وي  ورګوري به هغى ته

موټرو کې اخر به پورته کيږى یو ډبې ته

په ټوله لار له شر او شوره ډير وي پريشان

مامورغریب وي یو مړۍ ډوډۍ لره حیران

---------

دفتر په لور چې ځي نو لاره ده باندى شي بنده

په خط سير کې ګير شي نو خبره شي بى خونده

ترى لاړه حاضرى شي هم قضا شي ترېنه دنده

عاجز باندى  ددی  ورځې کرا هم شي تاوان

مامورغریب وي یو مړۍ ډوډۍ لره حیران

---------

دا بله يې در واخله چې دفتر ته شي دننه

رئس صاحب ته ورشه ستا یې کړله نن پوښتنه

بستونه تنقیصیږي ښایی شى په کى غمجنه

دا بل مصيبت ګوره دلته کړي به هم نقصان

مامورغریب وي یو مړۍ ډوډۍ لره حیران

--------

  چی کور ته شی دننه، وایی گاز په خلاصیدو دی

خبر ددی نه، نة وي چی کیلو یې بیا په څو دی

بوره هم کور کې ختمه ده، کمی هم د اوړو دی

نو دی غریب به بیا شي د هټۍ په  لور روان

مامورغریب وي یو مړۍ ډوډۍ لره حیران

---------

معاش چې کله واخلي د هټۍ په لور روان شي

چې نرخ د سودا وګوري په يو دوه کې  حيران شي

د وړو او د غوړو؛ بورې، په بيه پریشان شي

هټۍ واله ترې غواړى تير پورونه په دا آن

مامورغریب وي یو مړۍ ډوډۍ لره حیران

-----------

 په زړه کى داسې وايي دغه مياشت  به پوره نه شي  

چې دغه مياشت مې تيره شي ارامه به مې زړه شي

په دا ځلې تنخوا به مې بچیان، واړه ماړه شي  

خبر ددى نه، نۀ دى چې يې عمر دى روان

مامورغریب وي یو مړۍ ډوډۍ لره حیران

------

بچو ته وايي ځم چې درته راوړم کبابونه

چې راغلمه نو تاسو به ترې واخلې ښه خوندونه

 بى غمه به يي وخورو پرې ماړه به کړو ځانونه

دا ځکه چې تری غواړي کبابونه هر زمان

مامورغریب وي یو مړۍ ډوډۍ لره حیران

---------

دده ژوندون کې شته دى ډيری هیلې اميدونه

په زړه کې يې پراته دى ښه بى شميره ارمانونه

ارو مرو لري به ستا دربار ته سوالونه

عادله ذاته ته يي ورپوره کړی په ښه شان

مامورغریب وي یو مړۍ ډوډۍ لره حیران

--------

په ژوند کې له غربته تل ګرځيږي سرګردان

مامورغریب وي یو مړۍ ډوډۍ لره حیران

نسیم شاه «عادل»

۱۰/۲۸/۱۳۹۸